«Միավորված հայեր» կուսակցության պատվավոր նախագահ Նաիրի Սարգսյանը Ծիծեռնակաբերդում լրագրողների հետ կատարած հարցազրույցում անդրադառնալով Քայլըր Պարտեգը (ՔՊ) կուսակցության ներկայացուցիչների կողմից հնչող հայտարարություններին, որոնք վերաբերում են Ջահերով երթի ժամանակ Թուրքիայի դրոշն այրելու դեպքին, հայտարարեց, որ այսօրվա իշխանությունը Հայաստանը ապամոնտաժելու ծրագիր է իրականացնում։
Ըստ նրա՝ Նիկոլ Փաշինյանի գործողությունները հիմնավորում են այն մտածողությունը, որ նա սպասարկում է ոչ թե հայկական, այլ ադրբեջանական շահերը։ Նա նշեց, որ այս իշխանությունը կարող է դատապարտել ցանկացած հակաթուրքական և հակաադրբեջանական արարք, սակայն երբեք չի դատապարտի արևմտյան Ադրբեջանի կողմից առաջադրվող թեզերը, ինչը, իր խոսքով, նպաստում է հայի հիշողության միջից Եղեռնի և մեր պատմական հիշողության ջնջմանը։
Հարցին՝ արդյո՞ք հնարավոր է, որ այս իշխանությունների գործողությունների հետևանքով ապրիլի 24-ը վերափոխվի այլ անվամբ կամ լիովին ջնջվի ցեղասպանություն բառը մեր պատմության միջից, Նաիրի Սարգսյանը վստահաբար պատասխանեց․ «Չեմ կարծում, որովհետև մենք և մեր հանրությունը թույլ չենք տա։ Անկախ նրանից՝ Նիկոլ Փաշինյանն ուր կլինի և ինչ գործողություններով հանդես կգա, հայի ինքնության պահպանման, ցեղասպանության ճանաչման, դատապարտման և պատժի ենթարկման քաղաքականությունը կշարունակվի»։
Նաև անդրադառնալով «Ուժեղ Հայաստան» նախընտրական ցուցակին՝ Նաիրի Սարգսյանը հաստատեց, որ իր կուսակցության ներկայացուցիչներն ընդգրկված են այդ ցուցակում։ Հարցին՝ թե ինչու՞ նա ինքն է չընդգրկվել, պատասխանեց․ «Ես չեմ ցանկանում լինել, որովհետև պատգամավորական մանդատ ստանալու համար ակտիվ գործունեություն չեմ ծավալել»։
