Իրանի դեմ Միացյալ Նահանգների ու Իսրայելի 40-օրյա պատերազմի արդյունքների և Պակիստանում մեկնարկած ԱՄՆ-Իրան բանակցային գործընթացի հեռանկարների մասին խոսելիս՝ Զինված ուժերի պահեստազորի գնդապետ, ռազմական փորձագետ Հայկ Նահապետյանը 168 TV-ի «Ռեվյու» հաղորդաշարի եթերում հայտարարել է, որ Միացյալ Նահանգները բարոյական պարտություն է կրել այս պատերազմում։ Նրա կարծիքով՝ դեռևս մինչև երկշաբաթյա հրադադարի մասին հայտարարությունն էր, որ ԱՄՆ-ը նահանջի ճանապարհ բացել էր իր համար։
Ըստ ռազմական փորձագետի՝ Իրանի Իսլամական Հանրապետությունը, որը դիմակայում էր միջուկային երկու պետության՝ Միացյալ Նահանգներին ու Իսրայելին, փաստացի հաղթում է այս պատերազմում։ Նա Իրանի ռազմական հաջողության մեջ կարևոր դեր է հատկացնում Ռուսաստանի և Չինաստանի աջակցությանը։
Հայկ Նահապետյանի գնահատմամբ՝ պատերազմի նման արդյունքները կունենան էապես ազդեցություն տարածաշրջանի վրա՝ Իրանի ազդեցությունը զգալիորեն աճելու, իսկ Թուրքիայի կշիռը՝ կտրուկ ընկնելու։
Խոսելով պատերազմից քաղաքական դասեր քաղելու մասին՝ փորձագետը նաև անդրադարձել է Իրանի և Հայաստանի հանդեպ Ադրբեջանական Հանրապետության անթաքույց տարածքային նկրտումների թեմային։ Նա նշել է, որ Ադրբեջանում պետական ամենաբարձր մակարդակով խրախուսում և առաջ են տանում այսպես կոչված «արևմտյան Ադրբեջանի», «հարավային Ադրբեջանի» և «մեծ Ադրբեջանի» ցնորամիտ գաղափարները։ Ըստ Նահապետյանի՝ այս ամենը պետք է իմանալ ոչ թե խուճապ առաջացնելու, այլ վտանգի չափը հասկանալու համար։
Նա նաև շեշտել է, որ «մեր պատերազմը չի ավարտվել. մենք միայն մեծ ճակատամարտում ենք պարտվել»։ Ըստ նրա՝ Ալիևը լիովին գիտակցում է, որ Իրանի դեմ ռազմական արկածախնդրության գնալու դեպքում «պատառ կարող է դառնալ ամբողջ Ադրբեջանը»։
