Այսօր Ներքին գործերի նախարարությունում տեղի ունեցավ Հայաստանի Հանրապետության ոստիկանության 108-րդ տարեդարձին նվիրված կոլեգիայի հանդիսավոր նիստը, որին մասնակցեց ՀՀ վարչապետ Նիկոլ Փաշինյանը։
Նիստին նախորդելով՝ վարչապետը և ՆԳ նախարար Արփինե Սարգսյանը ծաղիկներ խոնարհեցին Ոստիկանության շենքի բակում տեղադրված հուշատախտակին՝ հարգանքի տուրք մատուցելով հանուն հայրենիքի կյանքը նվիրաբերած ոստիկանների հիշատակին։
Ելույթի ընթացքում Նիկոլ Փաշինյանը շնորհավորեց ոստիկանության բոլոր ծառայողներին տարեդարձի առթիվ և շնորհակալություն հայտնել ծառայության համար։ Նա նշեց, որ ոստիկանությունը մեր երկրում կայացման և զարգացման տարբեր փուլեր է անցել՝ անցնելով շրջադարձային փոփոխություններ իրավակարգի և կարգուկանոնի պահպանման ոլորտում։
«Ոստիկանությունը պետության ողնաշարն է, և այդ ողնաշարը միշտ պետք է ամուր լինի, դա բոլոր քաղաքացիների շահերից է բխում», — ընդգծեց վարչապետը՝ նշելով, որ ժամանակակից պահանջներին համապատասխան զարգացող ոստիկանական համակարգի առկայությունը կարևորագույն պայման է երկրի անվտանգության և կայուն զարգացման համար։
Նիկոլ Փաշինյանը նաև խոսեց բարեփոխումների մասին՝ նշելով, որ դրանք շարունակական գործընթաց են, որը պետք է ընդգրկի տեխնիկան, օրենսդրությունը, համազգեստը, սպառազինությունը և կարգավորումները։
Երկրի ղեկավարը կարևորեց ոստիկանի անհատական պատասխանատվության և առաջնորդության հասկացությունները՝ նշելով, որ յուրաքանչյուր ոստիկան, անկախ իր պաշտոնից, պետք է ստանձնի առաջնորդության դեր իր պատասխանատվության շրջանակում։ «Ոստիկանության բոլոր ծառայողներն առաջնորդություն պիտի ստանձնեն, որովհետև եթե ոստիկանը շարքային է, դա չի նշանակում, որ ինքն առաջնորդ չէ», — նշեց նա՝ ընդգծելով, որ այս հայեցակարգը վերաբերում է պետական կառավարման բոլոր համակարգերին։
Ամփոփելով իր խոսքը՝ Նիկոլ Փաշինյանը ևս մեկ անգամ շնորհավորեց բոլորին Ոստիկանության օրվա առթիվ՝ հավատարմություն հայտնել ոստիկանության ծառայողների նվիրվածությանը, պրոֆեսիոնալիզմին և ներուժին։ Նա վստահ է, որ ոստիկանությունը կկարողանա լուծել առջևում կանգնած խնդիրները և ամեն օր դառնալ ավելի պրոֆեսիոնալ, պատասխանատու և արդյունավետ։
Նիստի ավարտին ՀՀ վարչապետի հուշամեդալով և շնորհակալագրով պարգևատրվեցին Ոստիկանության ծառայության մեջ ներդրած ավանդի և ծառայողական պարտականությունները կատարելիս ցուցաբերած նվիրումի համար մի խումբ ծառայողներ։
