Ճարտարապետության և շինարարության Հայաստանի ազգային համալսարանի ուսանողների և ասպիրանտների կոլեկտիվը ստեղծել է Երևանի բնակելի շենքերի տվյալների բազա, որը կարող է զգալիորեն արագացնել և հեշտացնել շինությունների սեյսմակայունության գնահատումը և դրանց վերանորոգման անհրաժեշտության որոշումը։
Առաջին փուլում բազայի մեջ մտցվել են Դավթաշեն թաղամասի շենքերի տվյալները։ Այս տվյալների բազան համախմբում է տարբեր աղբյուրներից ստացված տեղեկություններ՝ Երևանի քաղաքապետարանի, քաղաքաշինության կոմիտեի և այլ պետական մարմինների տվյալները։ Բացի այդ, հետազոտողները տեղում են կատարել շենքերի վիճակի մոտավոր գնահատում։
«Այս բազան ունի մեծ գործնական արժեք», — ասում է հետազոտության մասնակից, ճարտարապետության թեկնածու և համալսարանի Երիտասարդ հետազոտողների միության նախագահ Մեսրոպ Սահակյանը։ «Օրինակ, ունենալով խորհրդային շրջանի նույնանման նախագծերով կառուցված բարձրահարկ շենքերի վերաբերյալ ամբողջական տեղեկատվություն, կարելի է համեմատել դրանց մաշվածության աստիճանը։ Եթե պարզվի, որ որևէ շենքում այն ավելի բարձր է, ապա կարելի է ավելի խորը ուսումնասիրել հնարավոր կողմնակի գործոնները»։
Ասպիրանտ Լուսինե Եղիյանը նշում է, որ այս համակարգը հետազոտողների համար էականորեն պարզեցնում է աշխատանքը։ «Նրանք պետք է միայն որոնեն անհրաժեշտ բնութագրերով շենքեր, և համակարգը կներկայացնի բոլոր անհրաժեշտ տեղեկությունները՝ առանց անհրաժեշտության դիմելու տարբեր պետական մարմիններ»։
Հետազոտողների խումբը նախատեսում է բազան ընդլայնել՝ ներառելով քաղաքի յուրաքանչյուր թաղամասի տվյալները։ Նրանց աշխատանքի մասին գիտական հոդված արդեն հրապարակվել է համալսարանի «Journal of Architectural and Engineering Research» ամսագրում։
Այս նախագծին մասնակցել են նաև մագիստրոս Արևիկ Նազարյանը և հայցորդ Մարիամ Քոչարյանը, իսկ ճարտարապետության դոկտոր Սարգիս Թովմասյանը խորհրդատվություն է տրամադրել երիտասարդ մասնագետներին։ Աշխատանքն իրականացվել է համալսարանի դրամաշնորհի շնորհիվ։
