«Ուժեղ Հայաստան» կուսակցության խորհրդի անդամ Նարեկ Կարապետյանը «Ուժեղ խաղաղություն» անվտանգության ծրագրի շնորհանդեսի ընթացքում հայտարարել է, որ Սամվել Կարապետյանի միջազգային կապերը աշխարհի տարբեր ծայրերից նոր ներդրումներ կբերեն Հայաստան։
Ըստ Նարեկ Կարապետյանի՝ հունիսի ընտրություններից հետո Սամվել Կարապետյանը կստանձնի երկրի կառավարման պատասխանատվությունը, ինչը, ինչպես նա նշել է, հաստատված է բոլոր անկախ հարցումներով և հազարավոր քաղաքացիների կողմից ստացված ազդակներով։ Նրա խոսքով՝ առաջիկա առաջնահերթությունը կլինի վերականգնել այն վնասը, որը, նրա կարծիքով, երկրի տնտեսությանն ու անվտանգությանը հասցրել է Նիկոլ Փաշինյանը։
Նա ընդգծել է, որ տնտեսական ծրագրում ներառված յուրաքանչյուր հանձնառություն երաշխավորվում է Սամվել Կարապետյանի կողմից։ «Դրանք նախընտրական խոստումներ չեն, այլ հստակ տնտեսական քայլեր են, որոնք կկիրառվեն հենց Սամվել Կարապետյանի վարչապետ դառնալու առաջին օրվանից»,- ասել է Նարեկ Կարապետյանը՝ հավելելով, որ սա կօգնի բարձրացնել մեր երկրի յուրաքանչյուր քաղաքացու կենսամակարդակը, կասեցնել մարզերի բնակչության նվազումը, վերակենդանացնել աղքատության մեջ գտնվող համայնքները և նոր խթան հաղորդել մայրաքաղաքին։
Նարեկ Կարապետյանը նաև նշել է, որ տնտեսական ծրագիրը սկսվել է, քանի որ հզոր տնտեսությունն է այն ամուր հիմքը, որի վրա կարելի է կառուցել ուժեղ և երկարատև խաղաղություն։ Նրա խոսքով՝ աշխարհում այն երկրները, որոնք չունեն հզոր տնտեսություն, չեն կարող լիարժեք երաշխավորել իրենց անվտանգությունը, հատկապես այնպիսի անհանգիստ տարածաշրջանում, ինչպիսին այսօր է Հայաստանը։ Նա նաև նշել է, որ Չինաստանից Եվրոպա տանող անվտանգ ճանապարհի շահագրգրվածությունը, որը գոյություն ունի աշխարհում, հնարավորություն է, որից կարող է օգտվել միայն Սամվել Կարապետյանի նման ուժեղ առաջնորդը։
